ភ្នំពេញ ថ្ងៃទី១០ ខែតុលា ឆ្នាំ២០២២
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវសប្បុរសជន វិស័យឯកជន និងអង្គការមិនមែនរដ្ឋាភិបាល សូមបន្តចូលរួមឧបត្ថម្ភជាធនធាន និងមធ្យោបាយនានា ដើម្បីជំរុញចលនាអប់រំតាមប្រព័ន្ធកាយរឹទ្ធិកម្ម រួមចំណែកលើកកម្ពស់ការអប់រំចំណេះដឹង ជំនាញ និងសីលធម៌ ក្នុងស្រទាប់យុវជនកម្ពុជាប្រកបដោយប្រសិទ្ធភាព។ ការអំពាវនាវរបស់សម្ដេចតេជោនាយករដ្ឋមន្ត្រីត្រូវបានធ្វើឡើង ក្នុងពិធីបិទមហាសន្និបាតកាយរឹទ្ធិជាតិកម្ពុជា អាណត្តិទី៤ ដែលមានអ្នកចូលរួមប្រមាណ៧០០នាក់ នារសៀលថ្ងៃទី ១០ ខែតុលា ឆ្នាំ២០២២ នៅវិស្ថានបច្ចេកវិទ្យាកម្ពុជា។
សម្ដេចតេជោ ហ៊ុន សែន បានផ្ដល់នូវការលើកទឹកចិត្ដលើចំណុចសំខាន់ៗមួយចំនួន ដើម្បីភាពរីកចម្រើននៃចលនាកាយរឹទ្ធកម្ពុជា ដែលក្នុងនោះរួមមាន ១. ក្រុមប្រឹក្សា និងគណៈកម្មាធិការប្រតិបត្តិកាយរឹទ្ធជាតិកម្ពុជាថ្នាក់ជាតិ ថ្នាក់រាជធានី ខេត្ត ក្រុង ស្រុក ខណ្ឌ សម្រាប់អាណត្តិទី៤នេះ ត្រូវបន្តការងារលើកកម្ពស់ការងារអប់រំ និងបណ្ដុះបណ្ដាលធនធានយុវជន តាមរយៈការជំរុញចូលរួមក្នុងចលនាកាយរឹទ្ធិ និងអភិវឌ្ឍន៍កម្មវិធីស្វ័យអប់រំខ្លួនឯង ដើម្បីក្លាយជាពលរដ្ឋកាយរឹទ្ធដែលផ្ដល់ផលប្រយោជន៍ដល់សង្គមជាតិ។ ត្រូវបន្តរៀបចំគោលនយោបាយ ផែនការយុទ្ធសាស្ត្រ ឯកសារគតិយុត្តលិខិតបទដ្ឋានរដ្ឋបាលនានា ដើម្បីធានាប្រសិទ្ធភាពការងារ និងអភិបាលកិច្ចល្អ។ ២.ត្រូវបង្កើនកិច្ចសហប្រតិបត្តិការជាមួយអង្គការពិភពលោកនៃចលនាកាយរឹទ្ធិ និងគ្រប់បណ្ដាអង្គការកាយរឹទ្ធិជាតិ ថ្នាក់តំបន់ និងពិភពលោក សំដៅបង្កើនប្រសិទ្ធភាពអនុវត្តន៍ផែនការយុទ្ធសាស្ត្រ ការផ្លាស់ប្ដូរកម្មវិធី ការបណ្ដុះបណ្ដាជំនាញកាយរឹទ្ធិកម្ម និងអភិវឌ្ឍន៍សមត្ថភាពដឹកនាំកាយរឹទ្ធិគ្រប់លំដាប់ថ្នាក់ ស្របតាមកម្រិតបទដ្ឋានតំបន់ និងពិភពលោក។ ត្រូវបន្តលើកទឹកចិត្តយុវជនកាយរឹទ្ធិ ដែលមានសមត្ថភាព និងលក្ខណៈសម្បត្តិគ្រប់គ្រាន់ឱ្យចូលរួមជាបេក្ខជនប្រកួតប្រជែង ក្នុងគណៈកម្មការកាយរឹទ្ធិ ថ្នាក់តំបន់ និងពិភពលោក។ ៣. ក្រុមប្រឹក្សា និងគណៈកម្មាធិការប្រតិបត្តិកាយរឹទ្ធិកម្ពុជាថ្នាក់ជាតិ ថ្នាក់រាជធានី ខេត្ត ក្រុង ស្រុក ខណ្ឌ ត្រូវបន្តរៀបចំផែនការសកម្មភាពរយៈពេលវែង រយៈពេលមធ្យម និងរយៈពេលខ្លី ព្រមទាំងការខិតខំកៀរគរសប្បុរសជន មូលនិធិកាយរឹទ្ធិគ្រប់លំដាប់ថ្នាក់ ដើម្បីជួយឧបត្ថម្ភគាំទ្រសកម្មភាពកាយរឹទ្ធិជាតិកម្ពុជាទូទាំងប្រទេស។ ៤.ក្រុមប្រឹក្សា និងគណៈកម្មាធិការប្រតិបត្តិកាយរឹទ្ធិកម្ពុជាថ្នាក់ជាតិ ត្រូវបន្តពង្រឹងប្រសិទ្ធភាពដំណើរការរចនាសម្ព័ន្ធគ្រប់គ្រង និងសកម្មភាពការងារកាយរឹទ្ធិជាតិកម្ពុជា ថ្នាក់រាជធានី ខេត្ត ក្រុង ស្រុក ខណ្ឌ ឱ្យមានដំណើរការល្អ ជាពិសេសត្រូវរៀបចំគោលនយោបាយ និងកម្មវិធីសម្រាប់កាយរឹទ្ធិរៀមច្បង និងបង្កើតក្រុមកាយរឹទ្ធិរៀមច្បង ដើម្បីបន្តយកចិត្តទុកដាក់ប្រមូលផ្ដុំ និងគ្រប់គ្រងកម្លាំងកាយរឹទ្ធិ។
ជាមួយគ្នានេះ គ្រប់គ្រឹះស្ថានសិក្សាសាធារណៈ និងឯកជន ពុំទាន់បានរៀបចំចលនាកាយរឹទ្ធិ ត្រូវសហការជាមួយក្រសួងអប់រំយុជន និងកីឡា ដើម្បីកសាងកម្លាំងកាយរឹទ្ធិរៀមច្បង នៅតាមអង្គភាពរៀងៗខ្លួន ដោយធានាទាំងបរិមាណ និងគុណភាព។ ៥. ត្រូវបន្តរៀបចំកម្មវិធីបណ្ដុះបណ្ដាល និងអភិវឌ្ឍន៍សមត្ថភាពជំនាញកាយរឹទ្ធិកម្ម ដល់មេដឹកនាំកាយរឹទ្ធិតាមបណ្ដាគ្រប់កងឯកភាព ស្របតាមកម្រិតបទដ្ឋានអន្តរជាតិ ឱ្យក្លាយជាធនធានកាយរឹទ្ធិដ៏មានសក្ដានុពល ក្នុងការរៀបចំផែនការសកម្មភាព និងកម្មវិធីកាយរឹទ្ធិកម្មក្នុងកងឯកភាពរបស់ខ្លួន។ ៦.ត្រូវបន្តកិច្ចសហប្រតិបត្តិការជាមួយក្រសួង ស្ថាប័ន ឬវិស័យឯកជន អង្គការដៃគូ អង្គការពិភពលោកនៃចលនាកាយរឹទ្ធិ និងអង្គការសមាគមកាយរឹទ្ធិជាតិនៃបណ្ដាប្រទេសក្នុងតំបន់ និងពិភពលោក ដើម្បីសហការរៀបចំសិក្ខាសាលា វេទិកាយុជន ការផ្លាស់ប្ដូរវប្បធម៌ វគ្គបណ្ដុះបណ្ដាល និងការបោះជំរុំ ថ្នាក់តំបន់ និងពិភពលោក ដើម្បីបង្កើនកិត្យានុភាពនៃព្រះរាជាណាចក្រកម្ពុជា លើឆាកអន្តរជាតិ។ ៧.ត្រូវបន្តយកចិត្តទុកដាក់បំផុសសកម្មភាពកាយរឹទ្ធិកម្ពុជាគ្រប់លំដាប់ថ្នាក់ ស្វែងរកមូលនិធិគាំទ្រ និងរៀបព្រឹត្តិការណ៍ប្រចាំឆ្នាំ ជាមួយនឹងការចូលរួមក្នុងព្រឹត្តិការណ៍កាយរឹទ្ធិអន្តរជាតិនានា៕



